رمضان ... هادا حلو وهادا مالح

أيام رمضان قربات

و الناس بالشباكية والسفوف تشغلات

هادا حلو وهادا مالح

واخا أسيدي شي باس ماكاين تما

حيت دوائي أنفو فالدمة

إيوا ياسيدي و يا لالة إلى عندكم شي مرض مزمن وكاتاخدو الدوا ديما راه خاصكم تمشيو عند الطبيب تدوزو و تسولوه آش المعمول.

راه واخا انتوما مراض شحال هادا و عارفين وقتاش تاخدو الأدوية ديالكم راه فرمضان كاتتبدل القضية و كيخصكوم تستاشرو مع الطبيب ديالكم واش كاين شي دوا خاصكوم تنقصو منو؟ أو تبدلو التوقيت اللي كاتاخدوه فيه؟ أو ربما خاصكم تزيدو شي دوا آخر؟

وهاد الشي ما كاين غير الطبيب اللي غادي يعرف أشنو خاص يدار و ربما يطلب ليكم شي تحاليل حيث فرمضان كاتتبدل العادات والأوقات ديال الأكل و الله يسمح لينا حتى احنا كانديرو فالجهد جهدين.

وكلنا كانكدبو على روسنا ملي كانجلسو قدام طبلة الفطور و كلشي كايقول نفس الحاجة : وغادي ندوق غير واحد الشبيبيكية وشي بريوة صغيرة وشي نيم و شي كويس ديال العصير ... كلشي كانديرو ليه التصغير تاتنغرقوها ونبداو نتشكاو من بعد ماكنا كانتشهاو.

فالله يرحم ليكم الوالدين، اللي صحيح يراقب ما كلتو والكمية اللي كايتناول حيت المشكلة بالليل اصعيبة وخاصة ايلا كانت ثقيلة وعامرة ايدام و سكر و ليقاما.

ويراقب كمية الماء اللي كايشرب وياخذها مفرقة ماشي مرة وحدة ويحاول يتمشى واخا غير من بيت لبيت.

وما يجلسش هادي بنينة هادي زوينة حتى يولي غادي للمستعجلات. راه خاصكم تعرفو بأن من ضمن الحالات اللي كاتعمر المستعجلات فرمضان هي عسر الهضم و انتفاخ البطن بالغازات (خاصة عند الإفراط بتناول عصير الليمون) وافكرو عافاكم. واش الطبيب يتفرغ للمرضى اللي تدهورت الحالة الصحية ديالهم؟ و لا يقابل واحد ضارب 4 زلايف حريرة و 4 البطبوطات و ليترو ديال عصير الليمون و الشباكية ماحسبش شحال وزيد وزيد... فكروا شي شوية,

و بالنسبة للي مراض خاصكم تشوفو ضروري الطبيب هاد الأسبوع باش يشخص حالتكم الصحية، وينصحكم أشنو تديرو وخاصكم تلتازمو بالحرف بداك الشي اللي غايقول ليكم حيت الذات ديالكم فرمضان كاتتعرض لبزاف ديال التغيرات و خاصكم تبقاو على بال.

وخاص الناس اللي عندهم مريض فالدار يحتارمو نصائح الطبيب ويراقبو المريض ديالهم وخاصة إلى كان كبير فالسن أو من ذوي الاحتياجات الخاصة والى بانت شي أعراض ديال التعب والعيا أو الطحطيحة يخبروا الطبيب ومايتسناوش حتى يطيح المريض أو يدخل فغيبوبة لا قدر الله.

والمسألة ديال تصوم ولا ماتصومش راه الطبيب ما عندو تارباح فاش كايقول لك افطر. حيث هوا كايدوي على أساس السن ديالك و الحالة الصحية و النتائج ديال التحليلات. والله عز وجل غفور رحيم. إلى قال لك الطبيب ماتصومش ما تصومش وراه عندك الكفارة ديال الإفطار للضرورة.

ونزيدكم واحد النقطة مهمة. الناس اللي عندهم لوليدات صغار فالدار واللي مازال ما وصلوش البلوغ. راه خاصكم تنتابهو ليهم وتوجدو ليهم شي حاجة اللي عزيزة عليهم حيت بحكم ما كاتبقاوش تاكلو بنهار حتى هوما كايتأثرو بيكم وما كاياكلوش و العديد منهم كايضعافو فهاد الشهر واخا هوما فسن اللي خاصهم ياكلو بتوازن حيت هي سن النمو.

إيوا تهلاو فراسكم و فكرو مزيان واستاشرو مع الطبيب ديالكم باش تدوزو رمضان بخير وعلى خير.